meme

هاااااااااااااااي .. اليوم 21 /11 وهو عيد ميلادي كل عام وانا بخير .. وكل عام .. واهلي بخير .. وكل اللي احبهم بخير والله

 

 وشكرن

 

 

مساااحة للبيــع

 

عباره عن تنفيس  :d

 

 

من نفسي  لنفسي  .. او من قلبي  لقلبي  ..

 

يا ,M.. هاك قوسين وحطي  بهن عبارة ()  واحفظيهن واظهريهن  وخليهن امارة

لكل  شخص نفسه بالسوء  امارة .. وما يهم من يعدك  بنت جبارة

قولي  ذي  حياتي   وانا لها مختارة .. وخل انسى ما ضي  وادفن غبارة ..

قبل يجي  يوم  يغنابي  علي  عود ومزمارة .. او يحرج  بقلبي   بين سمسار  وسمسارة

واحكم على قلب  صغير  واسوقه لدماره  .. وحتى البزر  لفعلتي  يقول  انتي  حمارة والا حمارة

 

؛؛ مزنه  والحظ الردي ؛؛ رواية من الادب  الجاهلي

<مزنه والحظ الردي  > روايه من الادب  الجاهلي 

من احب  المواضيع لقلبي .. لاني  كتبنه بنفس  ..

 

 

..1 ..

 

 بينما كانت مزنه ترز طولها  في  انحاء   المنزل  .. ولاهي  لاقيتن لا شغلة ولا مشغلة.. وكان المنزل  حين ذاك فارغ <  ابو الفصحى اللي  درستيه

زبنت في  غرفتها كعادتها .. اشعلت الشموع  .. واضاءت اللنبات  بزعم خوفها من الظلام .. واستلقت على مرقدها الحريري  .. وبدات تمارس  اليوقا .. < لا يكثر خخخخ

فجأءة سمعت صوت ضحك .. ولكن من اين ؟؟ الرقلة اكملت الرياضه .. ظنا منها  ان اليوقا "تعطي  جو مهوب  صاحي .. على قولة  بنت خالتها خلدة "

وبدأ الصوت يتعالي  .. .. والضحك يزداد.. وهي  منغمرة في  اليوقا .. وحال نفسها يقول  "ياهي  ازعاج هاليوقا  .. الله يبلشتس  يا خلدة  تسانك ما تدلين على خير " وبينما فتحت مزنه عيناها .. اذا بباب  الدولاب   ينكسر  ويطلع ضوء   اخضر   قوي   مثل الوميض  ..

طارت عوينات مزنه  .. ومدت يداها  الى داخل  الدولاب  واذا بها تمسك  بهذا الضوء وتسحبه الى الخارج  وهي   مرتاعه  وحالها يقول  " يطلع اللي  يطلع بس  اهم شي  ما يعض  "

وطلع كتاب   يكسيه  كثير  من التربان .. ولكن ما هذا الكتاب  الذي  يصدر  اصواتا ؟؟! لا ومركب  ليتات ليزر   كامري  2005 ..

فتحت  مزنه الكتاب  .. كح الكتاب  !! وطلع غبار  .. ورات  دائره فيها  شخص   " لابسن عمه  كنه جحا "  يضحك ويقول  " يا قدمتس  يا مزنه "

ناظرت مزنه اليه "بزريه هالكبر واقتربت من وجهه وقالت "تـفـــوووو"

حقد عليها  وقال " ثكلتس  اهلن انجبوتس  يالتسلبه "

مزنه" ترا بدعس  على وجهك  .. مهوب  ازين لك"

قال"   اقول  يا  مزنه .. لا يكثر بس  .. تعالي  معي  بذا " اردفت مزنه"  وين بذا يالهيس  الاربد .. منتب  شايفن  خشمك ماخذن  نص  الكتاب  .. وريض  تبي  اجي  معك خخخ"

" بلا كثرة حتسي   .. هاتي  يدتس  بس  "

مزنه ذهلت من الامر   وقالت " شف انا   بقوم استخير .. واللي  الله كاتبه بيصير  "

قال " وماهي  الاستخارة؟!  "  قالت " وش  دخل  امك  انت !!"

استخارت مزنه  وذهبت اليه  وعلا مات التعجب باديتن على خشتها ؟؟! "اسمع   يا هذا ..  تراني  استخرت  ولم احس  بشي   لا بالقبول  او الرفض   فما السواة ؟؟ "

 قال " بلاتس   ما توضيتي  يالرفلا " وتلها  مع علباها الى عالمه .......

 

 

..2..

 

بينما كانت مزنه تغط في  سبات  عميق ..  بدأت تحس  بانزعاج..  وبينمها هي  تتمغط.." نعنبا اللي  يطاوعتس  يا خلدة.. لو اني  مستنزله على سامريات  تسان اشوا من ذا  اليوقا "

صوت يهمس  في  اذن مزنه " صبحتس  بالخير يا مولاتي "

مزنه  منسبهه " يالله الخيرة .. وين انا ؟؟!"

مولاتي  انتي  في مضاربنا " مضــارب  بني  سبهلـلـه" وزوجك الوالي  " سبهه بن سبهلـلـه"

اصاب  مزنه دوار  البحر  ولم تعد ترا امامها  شي  .. واغرورقت عيناها بالدموع .. وحال  نفسها يقول  " ابشري  بالهجولة .. اجل  سبهه بن سبهلله .. هذا وانا رافضتن  نجر  ولد خالي  عشان اسمه  مخيس  ووع ..  يالله يا ربي  لا تعاقبني  "

فاجتمعت الجاريات حول  مزنه .. وكلهن خالات خخخخخ ..

واعلمن الوالي  اني  "ابتسي  " دخل  الوالي  هارعا فارعا  " ماذا اصابكي  يا مزنتي   "

" ومن انت ؟؟"  " انا ابن سبهلـلـه زوجتس "  غضبت مزنه " سبهللك ما سبههل جدي قل امين "

وطرد الوالي  جميع  الجواري  .. بقصد الاستفراد  بالاميرة  "مزنه"

 

 

..3..

 

اقترب  الوالي  سبهه  من مزنه ..  وقال " مزنتي  .. هل  تعرفين انتس  الحسناء  الوحيده في  مضاربنا "  ايه داريه .. بلاه من قراده حظي  .. بعدين لا تميلح وخر  "

قال " انني  زوجك يا مزنه !!"  قالت  " أي  زوج ابتعد بعيدا .. لا ارجدنك رجدتن  ما تقوم منها "

 فرمقها الوالي   بنظرتن  وسعيبيلاته تقوطر  " احب  الصعب  وعناده يا مز مز "

 احست مزنه حينها انها  سقطت في  بيرن ماله قاع .. فبدات  تبحث  في  دميجتها  عن حنكتها  التي  لم تعرف لحياتها طريق .. وللاسف  ما طلع معها  شي  < يا هي  فراغ هالمزنه

قالت "اياها الوالي  سبهه .. لم اخبر اني  اعرست قط..  ولهذا انت  لست زوجي  ..

ووجودك الان معي  يعتبر خلوه غير شرعيه .. فلذلك سف تراب  وخلني  اذهب  الى منزلنا "

قال الوالي  وهي  قافله معه " أي   منزل  يا ام منزل  انتي  .. هذا منزلتس   ومالتس  طلعه  من هنا .. وصلتس  العلم "

ردت  مزنه بأسى " ولكن يا سبهه " قال " ما لكنشي  "

 

 

..4..

 

نام الوالي  على سريره  الحريري   وعطا مزنه المقفا ..  ضاربا بها عرض  الحائط .. وثبت بذلك ان العردز البدوي  يمشي  في  دمه مليون ..

احست مزنه انها بحلانتن بعمرها .. فشاورت نفسها  .. وقررت ان تطلب  من الله ان يزين الحال  ويفرج كربتها ..    وتوظت وتبي  تصلي  " والله البلشه  لا عباة .. ولا جلال .. وش  هالصلاة "

ومار  تجد  شرشفا مزبرق  لونه حمر  .. وتوكلت على بارئها  وصلت..

افاق   ابن سبهلله .. وشهق  شهقتن  ولا اطلدز حمار  بالديرة .. " ما بالك يا مزنه  انه  وشاحي "  قالت " وع ابوتس  يالصنان  هاك يالمخيس  "

  وسالها بأستغراب  " ولكن ماذا كنتي  تفعلين يا مزنه ؟؟ "

" العب  بلوت  وش رايك انت ؟؟!! انني  اصلي  اغدي   الحال يزين "

فطار  عقله " وماهي  الصلاة التي  تصلينها ؟؟!"

قفلت مع مزنه وقالت" ابن سبهلله .. كـل  تبــن طولـك  .. اجل  ما تعرف الصلاة يالسرسري ..

لا تقولي  انك تتن بعد ؟!"

فضحك ابن سبهلله ضحكتن مدوية " الله يصلحتس  يا مزنه .. حنا ترانا بالجاهليه ما بعد جانا الاسلام .. ولا عندنا لا حلال ولا حرام  ... لذلك سمينا بمضارب  بني  سبهلله "

 

..5..

 

بعد  ان سمعت مزنه ما قاله  لها سبهه .. " طلتها العافيه .. وقالت يا بت  ما بدهاش  " ونادت

مزنه الجاريات  ليولمنها .. ويزبرقنها  بانواع الحلل  .. فقالت احدى الجواري  وهي  شاقتها الوناسه " سيفرح الوالي   عند رؤيتك يا مولاتي  " قطبت حاجبيها مزنه  وقالت " على تبن انتي  والوالي   حقتس  .. انا ابي  ادشر  اليوم "

قالت " ما هذا يا مولاتي .. وشي  دشرته .. الوالي  سيقطعتس  اربا  .. المرأة  عندنا مثل الامه .. حتى وان كانت   زوجة الوالي  .. يعني  تركدي  يا مال الصلاح .. والا ابشري  بذبحتس  "

لبست مزنه النظارة الشمسيه  وقالت " اللي  اخبرة ان ما عندكم لا حلال ولا حرام صح ؟؟ يعني   انتي  ومولاك على شحم .. وبعدين الامه ذي  عندكم مهيب  عندي  .. هيا يا جواري   امغطن معي  .. ووروني  اخص  متسان  به منكرات "

 ولم ترد أي  من الجاريات .. وبا الخوف   على محياهن  فقالت مزنه بغضب  " ما بالكن جفلتن  امشوا لا العن خير اهلن جابوكم ..  وما عليكم انتم بوجهي   .. وابن امه اللي  يقربكن "

وساد الوناسه على خششهن ..

 

..6..

 

 

وذهبت الى ملهى اسمه  "  ليلتك ذهب  .. عند ابو لهب  "

وبما ان مزنه  لم تر غير بيت  ابوها "مطلدز" فاصبها ام الركب   من الروعه  .. وسالت احدى الجواري  "متاكدة  اننا بالجاهليه؟؟ ... ومهنا حلال ولا حرام؟؟ ..  والهيئه ما تجي  هنا  تقشش هالسمرمد ؟؟"

  اندبلت تسبد  الجاريه وقالت " مولاتي  واللي  يرحم والديتس  البـــــــــــخي "

ووقف  الجميع على كراعه  تحيه لمزنه   مرة الوالي  " ابن سبهلله "

 تربعت مزنه  وجاها النادل  " ما هي  طلاباتس  يا مولاتي ؟؟"

قالت " اول  شي  هات بارتشن .. لان العين علي    انت خابر  .. ثانين ابي   معسل عنب  "

ناظرنها الجواري زارياتن عليها  " ذي  اللي  بتخربها " فغضبت مزنه  وقالت " لم ترن شي  ايتها الجواري  .. الليل  بطوله .. ايها النادل   هات بلاك ليبل   .. والجميع على حسابي  "

قالت احدى الجواري  " مولاتي    تسمى  قدح من النبيذ  وليس  بلاك ليبل "

فضحكت مزنه  قائله " وش  يدريتس  يالتسلبه عن هالعلوم .. طيب  تفاهمي  معهم بما انتس  ابخص  مني  "   فقالت الجاره فرحة   ومسويه انها خبرة "  مولاتي    بقولهم يكثرون المزه " قالت مزنه " نعنبوا اللي  انتي  حيّه ههههههههه "

وفي  الوقت  الذي   وصل فيه الطلبات  ويبنما مزنه  تقرب   القدح الى فمها ..  دخل الوالي  وقال " عز الله  منتب  تكانه "

تضحك مزنه باستهزاء " يا شيخ طير  .. خلني  اكمل  قدحي "  قال الوالي  " مزنه وحطبه .. ترا اهلتس  مرسلينتس  يشوفون قوة ايمانتس  .. وهل  بترفضين  هذه الحياة او تتاقلمين معها !! .. والظاهر  انتس   فشلتني   في  الامتحان .. يلله  ارجعي   الى منزلك  ينتظرتس  حسابن عسير  " مزنه من القهر  قالت"  فيه احد قالك لك اياها الوالي  انك فكك .. طيب  تسان خليتني  اخنبق  الليله واوريك كيف الفشل  ..مدام السالفه فيها لعنه خير " ضحك  عليها الوالي وقال "  الله يصلحتس   يا مزنه .. اريدك ان تدركي   ان الحياة بذاتها اختبار .. انتبهي  لنفسنتس  واذلفي   ".. خنقت مزنه العبرة " يالله  يا ربي  لا تغضب  علينا  ولا تواخذنا  بجهالتنا:( "

 

 ما يستفاد  من الخنبقه اللي  فودز :

 

1-  هذا عيب  الانسان  يسوي  سواة  الناس  اللي   يروحلهم .. واحيان يسوي  العن .

2-   رجعت مزنه  الى اهلها .. وهي  تقول  النفس  امارة بالسوء  ..  وتحسفت على  اللي  سوته .. وتقضبت ارضها .

3-   مزنه تزوجت نجر   ..  على انها مهيب  مقتنعه .. بس  تقول  تكفير ذنوب  خخخخ

4-  احبني